Nagpatigayon sang produktibo nga mga paghinun-anon ang Bureau of Fire Protection (BFP) kaupod sa Korea National Fire Agency (KNFA) kag Korea Fire Institute (KFI) sa South Korea parte sa plano nga pagkuha sang mga fire truck paagi sa Government-to-Government (G-to-G) procurement.
Ini nga inisyatibo kabahin sang Service Establishment and Service Upgrading and Modernization Program sang BFP nga nagatuyo sa pagpauswag kag pagmodernisar sang serbisyo sa pagprotektar batuk sa sunog sa bug-os nga pungsod.
Samtang ginapadayon sang BFP ang iya misyon nga mahatagan sang serbisyo sa pagprotektar batuk sa sunog ang tagsa ka lugar sa Pilipinas, isa ka importante nga tikang ang amu nga mga paghinun-anon sa pagsulbar sang madugay na nga kakulangan sa sakop sang serbisyo, pagpalig-on sang kapasidad sa operasyon, kag pagsiguro nga mas madamo nga komunidad ang makabaton sang nagakaigo nga proteksyon batuk sa sunog.
Pagkatapos sang 35 ka tuig halin sang natukod ang BFP sa idalom sang Republic Act No. 6975, nagapalapit na sa katumanan ang handum nga mahatagan sang serbisyo sa sunog ang tagsa ka lugar sa pungsod.
Apang, ginapahanumdom nga ang mga kasugtanan sa pagkuha sang mga kagamitan kinahanglan pa nga tapuson. Ginapaabot sang BFP nga mapadayon ang mga inisyatibo kag mangin konkreto nga mga pagpauswag ang mga plano para sa kaayuhan sang pumuluyo nga Pilipino.
Ginalantaw man sa mga paghinun-anon ang posible nga pagkuha sang mga fireboat para sa mga marine fire station sang BFP. Ini agud mapalig-on ang kapasidad sa pag-apula sang sunog kag pagresponde sa emerhensya, ilabi na sa mga komunidad sa baybayon kag mga lugar nga may kaangtanan sa kadagatan.
Padayon nga ginahimo sang BFP ang mga tikang agud mapalapad kag mapauswag ang serbisyo sa sunog sa pungsod.
Paagi sa padayon nga kooperasyon kag paghiusa sa handum nga mapanalipdan ang publiko, nagapalapit ang Pilipinas sa katumanan sang handum nga ang tagsa ka lugar may access sa mas episyente, mas masaligan kag moderno nga serbisyo sa pag-apula sang sunog kag pagresponde sa emerhensya.
