Suportado sang Bureau of Fire Protection-Panitan ang “Vegetables in the Office” Program nga nagatuyo nga dumalahan ang self-sufficiency kag healthy nga pagpangabuhi kadungan sang pagpalapnag sang madamo nga benepisyo sang pagtanom.
Sa interview sang Bombo Radyo kay Fire Officer 1 Stephanie S. De La Cruz, Acting Chief sang Public Information Unit sang Bureau of Fire Protection Panitan, Capiz, iya ginpahayag nga ginakabig nila ini nga isa ka pamaagi agud makabulig sa pag-atubang sa krisis nga naeksperyensyahan subong kag katuyuan man sini nga magpakita sang maayo nga ihemplo sa komunidad.
Suno kay De La Cruz, ang pagpasangkad sang sustainable practices kag food security ang kaangot sang kampanya nga “May Gulay sa Office Program,” kun sa diin ginapatuman ang Vegetables in the Office Program sa bug-os nga Fire Station sang Panitan, Capiz.
Pahayag niya, dako ang nabulig sang programa bangud ginaganyat sini ang mga katapo sang Panitan Fire Station nga magkaon sang preska nga otan nga nakabulig agud mas mangin aktibo kag mabaskog sa ila nga trabaho.
Dugang pa niya, plano man nga palaparon pa ang programa pamaagi sang pagtanom sang mas madamo nga utanon kag pagpalapad sang garden area agud maka-ani sang nagkalain-lain nga sahi sang otan.
Interviewed by Bombo Gen Arcosa | via Zona Libre
