-- ADVERTISEMENT --
Preparado na ang Bureau of Fire Protection (BFP), sa palaabuton nga fire prevention month.
Sa interview sang Bombo Radyo kay SFO4 Selvino A. Ross , Jr., Municipal Fire Marshal sang Panay Fire Station, iya ginpahayag nga ang pag responde nagakinahanglan sang aktibo nga tikang sa pagtapna, pagpahaganhagan ukon pagplano sang pamaagi sa pagbulig sa mga tawo nga makaguwa sing madasig kon may sunog.
Suno kay SFO3 Ariel Luna, Municipal Fire Marshal sang Cuartero Fire Station, iya ginpahayag ang pagsaulog kada tuig sa Marso sa pagpasanyog sang pagkamahunahunaon sa kaluwasan kag pagtapna sang sunog sat ion sang mainit nga panahon kon ang mga isidente sang sunog masami nga nagadamo.
Pahayag ni Ross, sa palaabuton nga Marso, may matabo nga kick off activity sa Panay, Capiz nga pagasakupan sang iban pa nga prebado nga sektor nga magahatag sang ihibalo natuhoy sa importansya sang fire prevention kag proteksyon.
Dugang pa ni Luna, sa bilog nga bulan sang Marso sa Cuartero, Capiz sakop ang lima ka barangay ang fire lecture, fire drills sa eskwelahan ila nga may tuyo nga magtudlo sa mga estudyante kag pumuluyo sang mga husto nga pamaagi sa paglikaw sa kalayo kag paano magresponder sa oras sang emerhensya.
Galaum naman ang mga natungdan, nga nga ang ila mga pahanumdon kag leksyon sa fire prevention and protection magahatag sang dugang ihibalo sa publiko kag makahatag sang inspirasyon sa mga kabataan kag mga kababayan nga magpartisipar sa mga programa sang BFP.
