ROXAS CITY – Nagpanugyan ang Bureau of Fire Protection nga likawan ang tanan nga sahi sang palupok sa pagselebrar sang paskwa kag pagsug-alaw sa bag-ong tuig 2021.
Sa interview sang Bombo Radyo kay Fire Officer 2 Don Anthony Falcis sang BFP-Roxas City Fire Station, ginpahayag sini nga dapat magsunod sa mga ginapatuman nga mga pagsulundan agud malikawan ang pagluntad sang sunog tuga sang mga palupok.
Suno kay Falcis ang Oplan Iwas Sunog sa Pasko at Bagong Tao nga isa sa mga kampanya sang BFP sa diin ginapahanumdom sa tanan ang paggamit sang mga ginadumilian nga mga palupok.
Nakaalerto naman ang BFP-Roxas City Fire Station sa pagresponde sa mga insidente, aksidente kag sunog kadungan sang nasambit nga mga selebrasyon.
Dugang pa sini nga padayon sa gihapon ang mga katapo sang BFP sa paglibot mo sa mga lugar kag pagpatigayon sang inspeksyon ilabi na sa mga vendors sang mga palupok sa siyudad kag probinsya sang Capiz.
Nagpahanumdom man si Falcis nga may yara sang pagaatubangon nga penalidad ang madakpan nga mga vendors nga nagabaligya sang mga ginadumilian nga mga palupok.
Mahibaluan nga isa si Falcis sa mga ginpasidunggan sang Philippine Information Agency-Region 6 bilang Best Performing Information Officer sa bilog nga Western Visayas bangud sa madinalag-on kag mapuslanon nga mga programa kag kampanya sang BFP.
