ROXAS CITY – Kasado na ang mga aktibidad sang Bureau of Fire Protection para sa selebrasyon sang Fire Prevention Month sa bulan sang Marso.
Suno kay FO1 Don Anthony Falcis, tagpamaba sang Roxas City Fire Station, ang amo nga selebrasyon ang sandig sa Presidential Decree 115-A.
Ginpahayag ni Falcis nga ang tema sang nasambit nga selebrasyon sini nga tuig amo ang ‘Matuto Ka, Sunog ay Iwasan Na’.
Suno diri nga magasugod ang nasambit nga selebrasyon sa isa ka kick-off ceremony sa Marso.
Ginpahayag pa ni Falcis nga magatambong sa opisyal nga pagbukas sang nasambit nga selebrasyon ang mga katapo sang Roxas City Fire Station, mga fire volunteers kapareho sang Capiz Citizen’s Action Group (CACAG) kag Ferocity, mga emergency responders kaparego sang Capiz Emergency Response Team (CERT), Philippine Red Cross (PRC) Capiz Chapter, mga BFP retirees kag iban pa.
Kabahin man sang month-long celebration ang pagpasangkad pa sang Oplan Ligtas na Pamayanan sa mga kabaranggayan.
May patigayunon man nga isa ka orientation-seminar nga pagatambungan sang mga kabataan kun sa diin edukaron ang mga ini natuhoy sa trabaho kag responsibilidad sang mga bombero sandig sa ila mandatu.
May yara man sang Fire Emergency Simulation sa mga kabaranggayan kun sa diin magapatigayon sang fire drills agud matudluan ang publiko kun ano ang ila dapat nga himuon pananglitan may magluntad nga sunog sa ila lugar.
Pasangkaron man sang talatapan ang ila nga Public Visibility and Information-Dissemination Drive pinaagi sa bulig sang media ilabi na sang Bombo Radyo.
Balantayan man suno kay Falcis ang ila patigayunon nga konsiyerto kun sa diin ipasundayag ang talento kag kinaadman sang mga bombero.
