ROXAS CITY-Naka-alerto sa karon ang Bureau of Fire Protection Roxas City Fire Station agud mabantayan ang mga nagabaligya sang palupok sa Barangay Banica, Roxas City.
Sa interview sang Bombo Radyo Roxas kay Senior Fire Inspector Rowell Limjuco, Roxas City Fire mashall ginpahayag sini nga nakapadulong na ang mga katapo sang Bombero sa Barangay Banica sining siyudad kun sa diin amat-amat na nga nagapatindog sang mga stalls ang mga manugbaligya sang mga palupok.
Suno kay Limjuco nga nagpatigayon sang inspection ang mga katapo sang Bombero agud mapasiguro nga ginasunod ang mga ginapatuman nga mga safety protocols sang mga nagabaligya sang palupok agud malikawan ang sunog.
Kabahin sang mga dapat sundon sang mga natungdan amo ang pagbutang sang division nga human sa sim sa ila nga mga stalls.
Gin-athag man sang opisyal nga ang lokal nga gobyerno gid lamang sang siyudad ang makadesignar sang ila nga lugar nga pagabaligyaan.
Samtang ginpahayag man ni Limjuco nga igapaidalom man sa seminar ang mga firecracker vendors antes magbutang sang ila mga baligya.
Nagpanugyan ini sang mga vendors nga likawan ang pagbaligya sang mga ginadumilian nga mga palupok.
