Ginakabig nga importante sang Bureau of Fire Protection (BFP) Roxas City ang pagpatigayon sang Mental Health Awareness” agud mapasangkad pa ang ihibalo sang mga personnel sa importansya sang ikaayong lawas.
Sa interview sang Bombo Radyo kay Senior Fire Officer II Sussie May L. Magan, Public Information Officer sang Roxas City Fire Station, iya ginpahayag nga ang pagpartisipar sang mga personnel sa Mental Health Celebration nga ginpatigayon sang Capiz Provincial Health Office isa ka tikang agud madugangan ang ila ihibalo parte sa mental health.
Suno kay Magan, ang pag-ugyon sang mga personnel sa amo nga aktibidad kabahin sang paghatag sang suporta sa ila kaayuhan kag paghangop sa importansya sang pag-atipan sa kaugalingon, ilabi na sa pagtuman sang ila katungdanan sa pagserbisyo sa publiko.
Dugang pa sini, importante ang kaangay nga aktibidad agud mapahanumdom ang mga personnel nga atipanon ang ila kaugalingon samtang nagaserbisyo kag nagabulig sa komunidad.
