Nagpakigbahin ang Bureau of Fire Protection Tapaz, Capiz sang mga accomplishment report sang ila talatapan sang bulan sang Marso.
Sa interview sang Bombo Radyo kay Fire Inspector Rayman D. Vela, Acting Municipal Fire Marshal sang Tapaz, Capiz, iya ginpahayag nga sang fire prevention month sa fire safety enforcement may yara sila sang total 97 ka inspected buildings, 19 ka mga business establishment, 63 ka electrical installation, 13 fire safety evaluation clearance, duha ka occupancy sa building nga may yara sang kabugusan nga amount nga P25,532. 09.
Suno kay Vela, nangin 1st runner up man sila sa Barangay Fire Olympic contest, kag champion man ang ila talatapan sa provincial level sa binalaybay art contest.
Subong man, nakabaton man sila sang nagkalain-lain nga mga pagpasidungog kaangay sang top performing non-local government unit kag diploma of service, tanda sang ila wala untat nga pagserbisyo.
Pahayag pa niya, isa sa mga pinakadaku nga accomplishment sang ila talatapan amo ang pagbukas kag pag-ground breaking sang mga bag-o nga sub-station sa San Nicolas sa banwa sang Tapaz kag Barangay Banica sa syudad sang Roxas nga daku gid ang mabulig sa pagpadasig sang pagresponde sa tion sang sunog.
Dugang pa sang natungdan, nagapadayon sa gihapon ang ila pagpahanumdom sa publiko nga ipabilin ang presence of mind kag indi magpakampante sa sulod sang panimalay ukon establisyemento bangud ang sunog ang mahimo gid nga magluntad anuman nga oras.
