Nagpakigbahin ang Bureau of Fire Protection Tapaz, Capiz sang mga accomplishment report sang ila talatapan sang una nga quarter sang 2026.
Sa interview sang Bombo Radyo kay Fire Inspector Rayman D. Vela, Acting Municipal Fire Marshal sang Tapaz, Capiz, iya ginpahayag nga lakip sa mga accomplishment sang ila nga talatapan amo ang madinalag-on nga fire prevention month kag fire safety enforcement nga may nabalhag 8 ka sunog kun sa diin 4 ang residential kag 4 ka non-residential.
Suno kay Vela, nangin 1st runner up man sila sa Barangay Fire Olympic contest, kag champion man ang ila talatapan sa provincial level sa binalaybay art contest.
Nakabaton man sila sang nagkalain-lain nga mga pagpasidungog kaangay sang top performing non-local government unit kag diploma of service, tanda sang ila wala untat nga pagserbisyo.
Pahayag pa niya, isa sa mga pinakadaku nga accomplishment sang ila talatapan amo ang bag-o nga sub-station sa San Nicolas sa banwa sang Tapaz nga daku gid ang mabulig sa pagpadasig sang pagresponde sa tion sang sunog.
Dugang pa sang natungdan, nagapadayon sa gihapon ang ila pagpahanumdom sa publiko nga ipabilin ang presence of mind kag indi magpakampante sa sulod sang panimalay ukon establisyemento bangud ang sunog ang mahimo gid nga magluntad anuman nga oras.
