ROXAS CITY – Wala mapunggan sang isa ka Barangay Health Worker (BHW) nga ipautwas ang iya mga sentimyento natuhoy sa mga nagareklamo nga mga pumuluyo pag-abot sa Social Amelioration Program sang Department of Social Welfare and Development (DSWD).
Suno kay Cleofe Anala, health worker sang Barangay San Nicolas, Pilar, Capiz, nagalain ang ila nga buot bangud sa baylo nga pasalamatan, kasubong nga sila pa ang ginabasol sang iban nga pumuluyo nga wala pa sang kasiguraduhan nga makabaton sang bulig-pinansiyal gikan sa nasambit nga ahensiya.
Ginpahayag sini nga pagtamay kag pagpakamalaut pa ang ila nababaton sa pihak sang ila pagpanikasog nga malakip ang tanan para makabaton sang nasambit nga ayuda.
Wala suno diri nakita sang iban nga tawo ang ila sakripisyo bilang frontliner nga suno sa iya wala man sila sang may ginasweldo.
Ginklaro ni Anala nga ila lamang nga gina-una nga mahatagan amo ang mga makabig nga ‘indigent’ nga mga pumuluyo sandig sa ginmandu sa ila sang ahensiya kag wala diri sang pamulitika ukon pinilian.
Ang pagpautwas ni Anala ang nakuhaan sang live video kag na-post sa social media site nga Facebook nga gin-ulan sang madamo nga komento.
Sa nasambit nga video, ginpabutyag sang ginang nga ginahimo man nila ang tanan agud mapahangop kun sin-o lamang ang makabaton sang amo nga ayuda.
Ginsaad man sini sa nasambit nga video nga kuntani mangin open-minded ang tanan kag hangpon man ang ila sitwasyon bangud ginahimo man nila ang tanan agud mahatagan ang mga nagakadapat nga mahatagan sang nasambit nga bulig-pinansiyal.
