Makabaton sang napulo ka kilo nga bugas ang wala nakabaton sang ginpanagtag nga bugas sang nagligad nga Biyernes nga adlaw sa Barangay Dinginan, sining syudad.
Ini ang ginpahayag ni Grace Garcia, BHW sa nasambit nga barangay kag isa man sa nangin resipyente sang ayuda nga bugas sang gobyerno sang syudad matapos nagreklamo ang pila ka mga residente sang Barangay Dinginan nga wala nalakip sa distribusyon sang bugas.
Ginpahayag ni Garcia nga nagpanugyan si Mayor Ronnie Dadivas nga ilista ang tanan nga mga residente nga wala nalakip sa nakabaton sang bugas agud mahatagan sila.
Gin-athag man sang ginang nga iban nga wala nalakip sa listahan sa Barangay Dinginan kag wala naka-ambit sang ayuda nga bugas sang Roxas City government ang natukiban nga indi rehistrado sang nasambit nga barangay.
Apang aminado si Garcia nga ginpanugyanan sila sang ila presidente sa Gawad Kalinga sa Barangay Dinginan, nga magkadto sa balay ni anay Kapitan Iluminado Corros para malista ang ila pangalan kag mahatagan sila sang bugas.
