ROXAS CITY – Nagdepensa ang barangay health worker (BHW) sang Barangay Lonoy, Roxas City kasunod sa ginaalegar may pinilian nga pagtumod sang mga benepisyaryo sang Social Amelioration Program (SAP) sang Department of Social Welfare and Development (DSWD) sa ila barangay.
Suno kay Narcisa Benosa wala siya sa nagpasilabot sa pagpanglista sang mga benepisyaryo sa Sitio Sto. Niño sang nasambit nga barangay bangud ginhambalan siya ni Barangay Kagawad Ricky Ballos nga may ginauyatan na ini nga masterlist.
Apang aminado si Benosa nga may mga ginkakas sa listahan bangud natukiban nga yara ang ila pangalan sa roster sang mga Pantawid Pamilyang Pilipino Program (4P’s) members.
Suno diri nga dapat pa kuntani siya nga pasalamatan sang mga ginpangkakas sa listahan bangud kun ulihi na ini natalupangdan, posible nga nagbaton gidman sila apang gilayon man nga bawion sang ila mabaton nga kwarta.
Gin-aku sini nga bangud sa nasambit nga bulig-pinansiyal, may mga nagyawyaw sa iya nga iya mga kasilingan apang wala niya ini ginapatulan bangud nagapati siya nga wala ini sang anomaliya nga ginhimo.
Ginklaro sini nga indi siya ang nagpanglista sang mga SAP beneficiaries sa ila nga sitio gani kun may luyag man magreklamo nga wala makabaton, suno diri nga mas nagakadapat nga magdiretso sila sa ila punong barangay.
