Natigayon nga maaresto sang Bureau of Immigration ang Korean national kag natukiban ang isa ka suspected scamming hub sa enforcement operation sa Angeles City, Pampanga.
Ginpatigayon sang Intelligence Division-Special Response Team ang raid sang Pebrero 25 nga nagresulta sa pagkadakop sa 33 anyos nga si Yu Jaemin, isa ka Korean national.
Nag-ugat ang operasyon sa validated intelligence information sa diin ang subject amo ang involved sa operasyon sang ginasuspetsahan nga scam hub nga naga-target sa mga pareho man sini nga Korean nationals kag posible iban pa nga foreign victims.
Nagpatigayon sang surveillance ang mga operatiba sa target area kag gin-obserbahan ang subject nga naghalin sa iya ginatiniran kag nagkadto sa opisina nga yara sa Poinsettia Street sa Angeles City.
Sang ginsulong sang otoridad ang lugar, nakit-an sang BI operatives ang 11 ka mga Korean nationals nga aktibo nga naga-operate sang equipment.
Tatlo sa mga foreign nationals ang pugante kag may naga-eksister nga derogatory record, samtang ang iban ang natukiban nga nag-overstay sa pungsod, nga paglapas Philippine Immigration Act of 1940.
