MANILA, Philippines – Ginkuwestyon ni Bicol Saro party-list Representative Terry Ridon ang masami nga pagbiyahe niya sa luwas sang pungsod kag ang iya pinansyal nga ikasarang suno sa Statement of Assets, Liabilities, and Net Worth “SALN”, rekords ni Vice President Sara Duterte.
Sa ginpatigayon nga impeachment trial, ginpahayag ni Ridon nga yara sa luwas sang pungsod ang Bise Presidente sa sulod sang 91 ka adlaw humalin sang tuig 2025 tubtob sa subong kun sa diin ginatan-aw ini nga nagakahinanglanini sang P5M tubtob P8M base sa United Nations daily subsistence allowance standards.
Ginpahayag man ni Ridon nga sa 2024 SALN ni VP Duterte kag sa nagligad pa nga tuig, wala ini nagdeklara sang cash on hand, samtang ang iya negosyo suno sa SALN ang nagaangkon sang kapierdehan, gani ginakuwestyon niya kon diin naghalin ang ginagasto sa mga biyahe.
Suno pa kay Ridon, kon mapamatud-an nga ang mga biyahe ginapondohan sang mga donor ukon benefactor, mahimo ini nga magresulta sa posible nga paglapas sa layi batok sa graft.
Pahayag pa niya, lima na ka semana ang nagligad humalin nagsugod ang impeachment trial sa Senado kag pila na ka bulan man nga gintugutan sang House Committee on Justice ang impeachment complaints, apang wala sa gihapon nagtambong si VP Duterte sa mga hearing.
Dugang pa sa impormasyon suno sa Senado ang Article I sang Articles of Impeachment nga nagaangot sa ginpa-athag nga indi husto nga paggamit sang confidential funds sang Office of the Vice President.
Nahibaluan nga sa karon gin-disallow sang Commission on Audit “COA”, ang P375M nga confidential funds sang OVP para sa 2023 kag P73M para sa 2022, kun sa diin gintan-aw ini ni Ridon nga mahimo magsaka sa P448M ang posible nga liability ni VP Duterte kag sang iya mga staff kon mapamat-od-an ang disallowance.
