Nagapati si Bicol Saro party-list Rep. Terry Ridon nga mayorya sang mga katapo sang House committee on justice ang magaboto agud ideklara nga may yara sang “probable cause” ang impeachment complaints batok kay Vice President Sara Duterte.
Suno kay Ridon, ang ebidensya indi na makabig nga isa ka simple nga “smoking gun”, kundi isa ka “nuclear bomb,” pagkatapos nga ginbuyagyag sang Anti-Money Laundering Council ang ginaalegar makaduluda nga transaksyon nga nagalab-ot sa ₱6.7 billion nga may kaangtanan sa Pamilya Duterte.
Natalana nga hiwaton subong nga adlaw ang hearing, kon sa diin ginalauman nga istoryahan ang nabilin nga mga reklamo, lakip na ang alegasyon sang mga pamahog batuk kay President Ferdinand Marcos Jr., First Lady Liza Araneta Marcos, kag anay House Speaker Ferdinand Martin Romualdez.
Ginalauman man ni Ridon nga aprubahan sang Kamara ang committee report nga magarekomenda sang impeachment, kag malab-ot ang kinahanglanon nga numero sang boto agud mapasa ini sa Senado.
Samtang, suno kay Justice Committee chair Rep. Gerville Luistro, ang pagboto sa isyu sang probable cause ang mahimo nga patigayunon pagkatapos sang hearing kon wala sang may maghingyo sang dugang nga adlaw sang hearing.
