May liwat naman nga panibag-o sa pagtaas sa presyo sang mga produktong petrolyo sa masunod nga semana.
Sa pagbulubanta ni Department of Energy-Oil Industry Management Bureau Director III Rodela Romero, ang presyo sang kada litro sang gasolina posible nga magtaas sang P0.85 tubtob P1.15
Yara naman sa P1.55 tubtob P1.85 sang kada litro ang posible nga igataas sa presyo sang diesel kag P1.00 tubtob P1.10 naman sa kerosene.
Kaangut sini, ginsiling sang Jetti Petroleum nga matapos ang una nga apat ka adlaw nga MOPS (Mean of Platts Singapore) kag foreign exchange average batuk sa full week average sadtong nakaligad nga semana, ang presyo sang kada litro sang diesel posible nga magtaas sang P1.70 tubtob P1.80, samtang sa gasolina P1.10 tubtob P1.20 ang kada litro.
Ang mga kompanya sang langis masami nga naga-anunsiyo sang price adjustments kada Lunes, kag gilayon nga ginapatuman pagka-aga adlaw sang Martes.
Sadtong tinalikdan nga Martes, Hunyo 18, ang presyo sang gasolina, diesel, kag kerosene nagtaas sang P0.85, P1.75, kag P1.90 kada litro, suno sa pagkasunod-sunod.
