Lauman ang liwat nga pagsaka sang presyo sang mga produkto nga petrolyo buwas nga adlaw, Hulyo 9, 2024.
Ini na ang ika-apat nga semana nga sunod-sunod nga pagsaka sang presyo sang petrolyo kun sa diin ang gasolina ang ginalauman nga magasaka sang P1.50 tubtob P1.70 kada litro.
Ginalauman man nga magasaka ang diesel sang P.50 tubtob P.70 kada litro samtang ang kerosene naman ang magasaka sang P.60 tubtob P.80 kada litro.
Sadtong Hulyo 2, nagsaka ang presyo sang mga produkto nga petrolyo kun sa diin P.95 ang ginsaka sang presyo sang gasolina, P.65 sa diesel, kag P.35 sa kerosene.
Mahibaluan nga halin sadtong Enero sini nga tuig tubtob sang nakaligad nga semana, naglab-ot na sa P9.25 ang ginsaka sa kada litro sang presyo sang gasolina, P8.40 sa diesel, kag P1.75 sa kerosene.
