PANITAN CAPIZ – Lunsay naka-inum sang makahulubog nga ilimnon ang biktima kag suspek sa nagluntad nga paglabo sa Sitio Agbabadiang, Barangay Calaan, Panitan, Capiz.
Matandaan nga ginkilala ang biktima kay alyas Rene, 46-anyos, samtang ang ginatudlo suspek ang ginkilala kay alyas Wilmie, 29-anyos nga lunsay mga residente sang nasambit nga lugar.
Sa interview sang Bombo Radyo sa imbestigador sang Panitan Municipal Police Station nga si PSSg. Dale Daliva, ginpahayag sini nga sang natabo ang insidente naga-inum ang biktima sa puluy-an sang iya utod apang hinali nga nga naglabay ang suspek nga papauli na kun tani apang may nagluntad nga pagbinaisay sa tunga sang biktima kag suspek.
Tubtob nga naglab-ot sa punto nga nagpinugusay ang mga ini kag diri natigayon nga maagaw sang suspek ang matalum nga hinganiban sang biktima kabangdanan sang iya pagkalabo.
Mahibaluan nga nag-angkon sang pilas sa ulo kag likod ang biktima nga gilayon naman nga gin-respondehan sang katapo sang Panitan Municipal Disaster Risk Reduction and Management Office (MDRRMO) agud hatagan sang pauna nga pagbulong antes ginpadangat sa ospital.
Suno kay Daliva nga wala sang daan nga hiligut-anon ang magtimbang nga bahin.
Sa karun, nagapabilin sa kustodiya sang Panitan MPS ang nasambit nga suspek para sa nagakaigo nga disposisyon.
