ROXAS CITY – Padayon nga ginabulong sa magkatuhay nga ospital ang biktima kag suspek matapos ang nagluntad nga vehicular accident sa Barangay Rizal, Pontevedra, Capiz kaina takna alas 9:35 sang aga.
Ginkilala ang biktima kay Elizabeth Tari 57-anyos kag residente sang amu nga barangay, samtang ang ginapahayag suspek ang ginkilala kay Jay Aguilles 26-anyos kag residente sang Barangay Carataya, banwa sang Maayon.
Sa interview sang Bombo Radyo kay PSSg. Isaiah Don T. Bornales, ginpahayag sini nga samtang ginasubay sang suspek ang dalan nagikan sa banwa sang Pontevedra kag magapauli kun tani sakay sang iya motorsiklo nga Suzuki Gixer 150 sang aksidente sini nga nasanggit ang biktima samtang nagatabok sa dalan.
Bangud sini, nag-angkon sang pila ka mga pilas sa magkatuhay nga bahin sang lawas sanday Tari kag Aguilles.
Samtang, gilayon nga ginpadangat sa Bailan District Hospital ang biktima samtang ang suspek ang yara sa Roxas Memorial Provincial Hospital agud dapatan sang nagakaigo nga pagbulong.
Sa karun, yara na sa kustodiya sang Pontevedra MPS ang imbolbado nga motorsiklo para sa nagakaigo nga disposisyon.
