ROXAS CITY – Ginkumpirmar sang lola sang lalaki nga ginluthang sa Arnaldo Boulevard, Barangay, sini nga syudad nga indi na menor de edad ang iya apo.
Kilala ang biktima sa tawag nga Pipo Arroyo, nag-18 anyos sang Pebrero kag residente sang Brgy. Tanza Gua, Roxas City.
Ini ang ginkumpirmar ni Rosemarie Arroyo, 64-anyos, lola sang biktima, sang mainterview sang Bombo Radyo.
Ginpahayag sang lola nga kaina sang kaaganhon, ginbalitaan ini sang abyan ni Pipo nga si Cyrus Alparaque, nga naagyan sini si Pipo nga naluthangan sa kilid sang karsada, apang sang ulihe, nahibaluan sang lola nga upod ang mga ini kag tatlo pa ka mga persona.
Ginklaro sang nasambit nga lola nga wala sang kontra ang iya apo sa ila lugar kag isa ka mabuot nga klase sang tawo ang natalana nga magagradwar sa Grade 10 nga biktima.
Suno pa sa lola nga masami sa iya nobya sa Rizal St., sini nga syudad ang iya apo nagapadulong, kag kagab-i sang Domingo, Hunyo 12, naglaong si Pipo sa iya magulang nga magakadto sa Rizal, gani wala nag-ekspektar sa natabo kaina sang kaaganhon.
Sa karon, yara na sa istable nga estado ang biktima, kag ginsiling sang lola nga kilala sang iya apo ang nagluthang sa iya apang kun pamangkuton kun sin-o, wala na ini nagasugid.
Nahibaluan nga nagdako sa iya bilang lola ang nasambit nga biktima.
Ginsaysay ni ‘Nene’ nga indi na luyag paghingadlan, sa Bombo Radyo, nagaisahanon ini nga babayi sa lima tanan ka mga persona nga sakay sa motorsiklo, nagpadulong sanday Pipo kag Cyrus sa ila sa banwa sang Panit-an kagab-i agud sa ginapahayag ‘jamming’ apang mga alas-2 sa kaaganhon naghinagaday nga magpangaldo sa syudad sang Roxas.
‘Smooth’ man suno diri ang ila nga pagbiyahe nagikan sa Panit-an pa Roxas City.
Apang pag-abot sa atubang sang RMPH sang nagasugod na sila sa pagpangaldo, nanotisyahan sang mga ini ang mga motorsiklo nga nagapakarera.
Wala man nila ini ginsapak, kag sang nakatapos na sila sang pangaldo, nagdesisyon sila nga maglibot-libot padulong sa Baybay.
Apang, pag-abot sa atubang sang City Mall, ginparahan sila sang tatlo ka mga motorsiklo sakay ang tatlo man ka mga kalalakinhan nga ginabulubanta ni ‘Nene’ yara sa edad 20 tubtob 23 anyos kag may bitbit ang kada isa sa ila sang armas-luthang.
Nagpundo si Cyrus, kag nabatian si Pipo nga nagsiling “wala ko da ya sala” kag gilayon nga nagdalagan, apang gintiro ini sa tiil, tubtob nga natumba sa atubang sang pink hotel kag nag-angkon sang daplis sa natuo nga mata, kag kili-kili.
Madasig nga nagpalagyo ang mga suspek, kag wala man ginpasilabtan sanday ‘Nene’ kag mga kaupdanan sini.
Nagapadayon ang pagtumod sang mga kapulisan sa pagkakilanlan sang mga suspetsado.
Narekober sa ginluntaran sang insidente ang anum ka mga baseyo sang wala pa matumod nga klase sang armas-luthang.
