Naglab-ot na sa siyam (9) ang kabug-usan nga kaso sang fireworks-related injuries nga narekord sa bug-os nga probinsya sang Capiz, base sa pinakabag-o nga datos nga ginpagwa sang Provincial Health Office.
Sa interview sang Bombo Radyo kay Joeffry Pancho Espiritu, Development Management Officer IV kag Information Officer sang Department of Health Capiz, iya ginpahayag nga ang amo nga mga kaso ang nabalhag humalin Disyembre 21 tubtob Disyembre 31 kadungan sang pagsug-alaw sang Bag-ong Tuig.
Suno kay Espiritu, ang age group nga pinakamadamu nga apektado amo ang mga naga-edad 10 tubtob 19 anyos. Ang pinakabata nga biktima ang nagapang edaron sang 9 ka tuig, samtang ang pinakatigulang amo ang 56-anyos.
Sa distribusyon sang mga kaso, isa ang naghalin sa banwa sang Dumalag nga amo man ang pinakabag-o nga kaso nga nadugang sa listahan, 2 ang halin sa Dumarao, isa sa Jamindan, isa sa Mambusao, isa sa Pontevedra, kag tatlo sa Syudad sang Roxas.
Pahayag pa niya, apat ka mga biktima ang ginakabig nga may pinakagrabe nga injuries bangud may yara sang parte sang ila kamot nga nautod, samtang tatlo naman ang nag-angkon sang injury sa bahin sang ila mga mata.
Dugang pa sang natungdan, nagapadayon sa gihapon ang panawagan sang ila talatapan sa paglikaw sa paggamit sang palupok agud indi na madugangan pa ang kaso sang mga nalukpan sa probinsya.
