DAO CAPIZ – Ginapahayag nga nagtambag lamang ang biktima sa pagpangbuno sang kaupod sini sa ilimnan sa Barangay Duyoc, Dao, Capiz.
Matandaan nga ginkilala ang biktima kay alyas ‘Robinson’, 23-anyos samtang ang ginatudlo suspek ang ginkilala kay alyas ‘Marlon’, 38-anyos kag lunsay mga residente sa nasambit nga lugar.
Sa interview sang Bombo Radyo sa imbestigador sang Dao Municipal Police Station nga si PSSG. Anjo Dela Cruz, ginpahayag sini nga sang matapos mag-inum-inum ang biktima kag suspek kaupod ang ila mga abyan nagsaylo ang mga ini sa isa ka puluy-an apang sang wala pa sila makasugod sa pag-inum may nagluntad nga indi pag-intindihanay sa tunga sang suspek kag isa sa mga kaupod sini sa ilimnan.
Bangud sini, ginpakamaayo na lamang sang suspek kag biktima nga magpauli na lamang kun tani agud makalikaw sa gamo apang pag-abot sa guha didto liwat nagluntad ang kinagamo sa tunga sang suspek kag kaaway sini.
Suno kay PSSG. Dela Cruz, ginpatung-an sang biktima ang kinagamo kabangdanan nga siya ang naigo sa pagpangbuno sang suspek gamit ang ice peak.
Mahibaluan nga nag-angkon sang pilas sa natuo nga bahin sag tiyan ang biktima tuga sang pagpangbuno nga gilayon naman ginpadangat sa Senator Gerardo M. Roxas Memorial District Hospital – Dao, Capiz para sa nagakaigo nga pagbulong apang gintransfer ini sa Roxas Memorial Provincial Hospital (RMPH) kag natalana nga operahan.
Sa karun nagapabilin sa kustodiya sang Dao MPS ang suspek para sa nagakaigo nga disposisyon.
