Ginalauman ang mas mataas nga transmission charge ang makita sa Agosto 2026 nga bill sang kuryente sang mga konsumidor sa Luzon, Visayas kag Mindanao grids.
Suno sa National Grid Corporation of the Philippines (NGCP), ang transmission rate para sa July 2026 billing period nga ginabayaran sang mga distribution utilities kag electric cooperatives sini nga bulan, nagsaka sang 22.22% kag nangin P1.7560 kada kilowatt-hour (kWh), halin sa P1.4367 kada kWh sang nagligad nga bulan.
Ginpahayag sang NGCP nga ang pagsaka sang overall transmission charge naghalin sa “sharp increase” ukon daku nga pagsaka sang rates sang ancillary services (AS).
Ang AS rates amo ang pass-through costs para sa kuryente nga ginasuplay sang mga power generator nga nagahatag sang ancillary services kon may indi balanse sa supply kag demand sang kuryente.
Nagsaka sang 30.85% ang AS rates, halin sa P0.7941 kada kWh sang Hunyo pakadto sa P1.0391 kada kWh sa July billing period.
Gin-athag sang NGCP nga wala ini nagabenepisyo sa AS charges kag sa bisan ano nga pagbag-o sang AS prices.
Ang mga bayad direkta nga gina-remit sa mga generation company nga may bilateral contracts sa NGCP kag sa Independent Electricity Market Operator of the Philippines (IEMOP) para sa AS nga ginakuha halin sa Reserve Market.
Pahayag sang NGCP, bilang system operator, responsibilidad sini nga masiguro ang stability kag reliability sang power grid, ilabi na sa tion nga may indi balanse sa supply kag demand.
