ROXAS CITY- Kritikal sa ospital ang kondisyon sang isa ka 13-anyos nga solterito matapos nga magpapaltak sa ginapahayag peke nga doktor sa Roxas Memorial Provincial Hospital.
Suno kay Margarita Baarde, lola sang biktima, nagpadulong sila sa ospital agud ipapaltak ang iya duha ka mga apo kalakip na ang 13-anyos nga si Selmo.
Ginpalapitan sila sang isa ka lalaki nga nagpakilala John nga manugtulod sang wheel chair sa ospital kag ginpanugyanan nga magbalik na lamang pagkahapon bangud may kilala ini nga doktor nga nagapangpaltak.
Suno pa sa tigulang nagbalik sila sa ospital kag gindala sang peke nga doktor nga si Joerge Dijosa sa isa ka hulot nga yara man sa likod sang ospital kag didto ginpatigayon ang circumcition.
Aminado ini nga wala sila nagduda bangud kumpleto man sa kagamitan si Dijosa kag ginpatigayon pa ini sa sulod mismo sang bisinidad sang ospital.
Gindugang pa sang tigulang nga pagkaligad sang anum ka adlaw, naglain ang pamatyag sang solterito matapos nga magpaligo sa dagat bangud gin-abisuhan sang suspek nga magpaligo sa dagat agud madasig nga mag-ayo ang iya kinatawo.
Gilayon nga ginpadangat sa ospital ang iya apo kag nagaguwa nga ini ang natetanus bangud sa gamit nga ginturok sa iya.
Nahibaluan man nga indi sang isa ka doktor ang suspek kag anay ini nga assistant sang doktor nga nagapangpaltak sa ospital
