Nagpanawagan ang Bureau of Internal Revenue sa publiko, ilabi na sa mga retailers ukon manugbaligya sang vape products, nga maid-id nga tsekyaron ang ila mga produkto.
Mismo ang current commissioner sang Bureau of Internal Revenue nga si Commissioner Romeo D. Lumagui Jr., ang nagpahibalo sang ila panawagan sa mga negosyante nga tsekyaron kun lehitimo ang mga vape products nga ila gina-uyatan.
Ginpahanumdom man sini nga iparehistro ang ila mga negosyo sa Department of Trade and Industry agud mangin legal ang pagbaligya.
Dugang pa sini, nga dapat indi pagkalimtan ang pagbayad sang aplikable nga buwis, partikular ang excise tax, sa mga produkto nga ginabaligya.
Hugot nga nagpa-andam si Commisioner Romeo D. Lumagui Jr. sa publiko nga indi sila magduha-duha sa paglagas sa mga nagalapas sa kasuguan.
Suno sa iya, seryoso sila sa pagpasaka sang kaso kun matukiban nga may negosyo nga naga-operate sang ilegal.
Samtang, gin-anunsyo sang commissioner nga mahimo i-surrender sang mga tag-iya sang negosyo ang mga vape products nga gina-alegar wala ginabaligya sang lehitimo sa ila talatapan.
Kadungan sang iya paandam, ginhingyo sini ang publiko, partikular na ang mga negosyante, nga mangin selective sa mga negosyo nga ila ginasudlan kag likawan ang pagbaligya sang mga produkto nga napaslawan sa pagbayad sang excise tax.
Madumduman nga sang damlag lang nagpadulong sa Department of Justice ang nasambit nga commissioner agud magpasaka sang madamo nga kaso nga tax evasion batok sa pila ka mga kompaniya nga wala nagabayad sang buwis.
