ROXAS CITY – Liwat naman nga napuhag ang mga empleyado sang Bureau of Internal Revenue (BIR) Revenue District 72 sa Mckinley Street, Barangay 3, Roxas City matapos nakabaton sang ‘bomb threat’.
Sa interview sang Bombo Radyo kay Assistant Revenue District Officer Marichu Gloria Espinosa, gilayon sila nga nagguha sa nasambit nga talatapan matapos nakabaton sang text message ang isa nila ka empleyado nga nagapaandam nga may yara sang bomba sa sulod.
Ang nasambit nga mensahe ang gikan sa cellphone number nga 09120798074.
Bangud diri, temporaryo nga ginpauntat ang transaksiyon sa nasambit nga opisina kag gin-abisuhan ang mga tawo nga magbiya sa lugar.
Gilayon naman nga nagresponde ang mga otoridad nga ginalakipan sang Roxas City Police Station, Roxas City Fire Station, Philippine Coast Guard kag Provincial Disaster Risk Reduction and Management Office (PDRRMO) agud makordon ang nasambit nga opisina.
Suno kay Police Captain Ruby Magallanes sang Roxas City Police Station, negatibo sa bomba ang nasambit nga talatapan kasunod sang ginpatigayon nga inspeksiyon sang PCG-Roxas gamit ang ila nga K9-dogs.
Sa karon nagapadayon ang imbestigasyon sang mga otoridad sa nasambit nga insidente.
Mahibaluan nga ini na ang ikatatlo ka beses nga nakabaton sang bomb threat ang nasambit nga talatapan.
