ROXAS CITY – Nagpasalig si Bise Gobernador Jaime “Mitang” Magbanua nga siya na lamang maga-abaga sa pagpabulong sa paralisado nga pito ka tuig nga bata matapos nga ginaalegar nasobrahan sa dosage sang bulong nga ginturok sa iya sang na-confine ini sa Roxas Memorial Provincial Hospital (RMPH).
Pinaagi sa bulig ni Magbanua pagadal-on sa isa ka private doctor kag ospital ang pito ka tuig nga bata nga paralisado na ang nawala nga butkon agud matumod kun ini bala ang resulta sa sobra nga bulong nga ginturok sa iya.
Nagpromesa man si Magbanua nga kalakip ini sa patigayunon nga imbestigasyon natuhoy man sa apat ka mga pasyente nga napatay sa ICU sang nasambit nga ospital matapos nga wala ginpaandar ang generator sang nadulaan sang suplay sang kuryente sa siyudad kasunod sang pagpanalasa sang bagyo nga Ursula.
Nahibaluan nga paga-usisaon man sang provincial board kun sin-o ang may kakulangan kag kapabayaan sa nasambit nga mga insidente.
Sa karon, nagapasalamat naman ang ginikanan sang bata matapos nagdanggop sa Bombo Radyo agud magpangayo sang bulig nga makalab-ot sa provincial-board ang ila nga problema.
