ROXAS CITY – Ginpakigbahin sa Bombo Radyo sang isa ka bisita nga nagtambong sa eleksiyon sang Philippine Councilors League (PCL) Capiz Chapter ang iya personal nga eksperyensiya sa mahal nga pagpanukot sang plete sa ila ginasakyan nga tricycle.
Suno kay John Delos Santos, sang Bacolod City, wala sini ginalauman nga iga-post sang iya abyan ang ila pagbayluhanay sang mensahe kun sa diin ginpahayag sini ang iya eksperyensiya kun sa diin ginsukot ini sang tuman ka mahal sang ila ginsakyan nga tricycle.
Ginpahayag sini nga gikan sa isa ka bus terminal sa siyudad, duha ka mga tricycle ang ila ginsakyan kaupod ang duha niya ka mga kaupdanan kag naghinyo nga pangitaon ang venue sang eleksiyon sang PCL-Capiz Chapter nga amo ang Kapis Mansions sa Barangay Banica antes sila magpadulong sa ila teniran nga hotel.
Sang pag-abot sa venue suno sa iya, ginbilin nila ang ila mga kagamitan nga dala kag didto ginsukot sang isa ka tricycle sang 300 pesos.
Suno pa kay Delos Santos nga gintestingan pa sini nga mag-ayu apang wala gid nagpasugot ang tricycle driver.
Kasunod sini nagpadiretso pa ang grupo ni Delos Santos sa isa ka tricycle sa ila pagateniran nga hotel nga malapit lang man sa venue.
Suno kay Delos Santos, diri na kag nagbayad sila sang 400 pesos sa tricycle driver apang ginapahayag nga naghinyo ang driver nga dugangan ini sang 100 pesos.
Gindugang pa sini nga naghatag pa sang number sa ila ang driver nga mahimo nila ma-contact kun magalagaw sila sa siyudad.
Ginpahayag ni Delos Santos nga wala sang katuyuan nga mangguba sa mga tricycle drivers sa siyudad kundi nagpamangkot lamang ini sa iya abyan kun husto gidman ang ginsukot sa ila.
Sa katapusan naghatag ini sang mensahe sa duha ka mga tricycle drivers nga kuntani indi nila pagliwaton ang pagpanukot sang indi ensakto nga plete bangud nabalik man sa mga tricycle drivers sang siyudad ang kalain nga impresyon.
