ROXAS CITY – Kanselado ang biyahe sang Cebu Pacific subong nga adlaw bangud sa mabaskog nga ulan nga dala sang malain nga panahon.
Wala nakahugpa sa Roxas City airport kaina sang aga ang flight 5J373 sang Cebu Pacific kag pila ka beses nga naglibot libot antes nagbalik sa Metro Manila bangud sa zero vissibility.
Bangud sa aberya nga natuga sang kanselasyon nga biyahe sang ila nga mga pasahero nagprovide sang van ang pamunuan sang Cebu Pac nga amo ang nagdul-ong sa mga nagadali nga mga pasahero sa Iloilo kag Kalibo airport.
Samtang ginatus ka mga motorista ang stranded bangud sa pagtaas sang lebel sang tubig sa Barangay Ondoy, Ivisan, Capiz.
Indi maagyan subong sang magagmay nga mga salakyan ang nasambit nga lugar bangud sa hinali nga pagtaas sang tubig nga dala sang mabaskog nga pagbgbo sang ulan humalin pa kaina sang aga.
Ginpahanumdum ang mga biyahero nga likawan nga mag-agi sa amo nga lugar agud indi ma-delay sa ila nga pagbiyahe.
