ROXAS CITY – Nagapabilin ang biyahe sang CERES Bus sang Vallacar Transit Incorporated nagikan sa probinsya sang Aklan kag Capiz tubtob sa Hulyo 4 padulong sa probinsya sang Iloilo.
Ini ang ginpahayag ni Janice Original, Administrative Manager sang Vallacar Transit Incorporated sang mainterview sang Bombo Radyo.
Suno kay Original nga padayon ang biyahe sang CERES Bus nagikan sa Roxas City Transport Terminal padulong sa probinsya sang Iloilo subong nga adlaw, Hulyo 2 tubtob sa Hulyo 4, 2020.
Apang, indi pa ini makapasalig bangud indi pa mabal-an kun may yara sang pagbag-o sa biyahe nagikan diri sa siyudad sang Roxas pakadto sa Iloilo.
Ginpahayag ni Original nga ginahulat pa nila ang executive order nga igapaguwa ni Capiz Governor Esteban Evan “Nonoy” Contreras kun sa diin nakadepende ang pagbiyahe sang mga CERES Bus.
Magluwas diri, magapatigayon man sila sang meeting kaupod ang pila ka mga managers sang Vallacar Transit Inc. angut sa operasyon sang ila nga pagbiyahe kag kun sa diin kutob ang boarder nga papanaugon ang mga pasahero.
Nagpanawagan man si Original sa mga tawo nga may yara sang trabaho ukon plano nga magbalik sa probinsya sang Iloilo nga kun mahimo subong pa lamang nga adlaw mas maayo nga makapauli na sa amo nga probinsya.
Apang, ang mga pasahero naman nga nagikan sa Iloilo mahimo pa nga makapauli diri sa siyudad sang Roxas.
Ini bangud wala pa sang kasiguraduhan kun dalayon sa gihapon ang pagbiyahe sang CERES Bus padulong sa Iloilo buwas nga adlaw.
Dugang pa ni Original nga tubtob alas 6:30 lamang sa gab-i ang last trip sang biyahe sang CERES Bus nagikan diri sa siyudad padulong sa Iloilo.
Mahibaluan nga ginhatagan lamang ni Iloilo Governor Arthur Defensor Jr., sang tubtob buwas nga adlaw Hulyo 3, ang mga residente sang probinsiya sang iloilo nga yara sa Capiz, Aklan, Antique, Negros Occidental kag Bacolod City nga makapauli sa nasambit nga probinsiya.
Samtang, pahanugotan lamang nga magsulod sa probinsiya sang iloilo ang mga indibidwal nga indi residente sang nasambit nga probinsiya magluwas gid lamang sa mga empleyado sang gobyerno, mga Health kag Emergency Frontliners, mga indibidwal nga nagabiyahe nga may kaangtanan sa humanitarian activities, mga indibidwal nga ginhatagan sang awtoridad nga magpadulong sa airport agud magbiyahe padulong sa luwas sang pungsod, mga Overseas Filipino Workers repatriates kag mga residente sang probinsiya sang Guimaras.
