ROXAS CITY – Liwat nga magabalik-biyahe ang mga eroplano sa probinsiya sang Capiz.
Ini ang ginkompirmar mismo ni Provincial Disaster Risk Reduction and Management Office (PDRRMO) Head Judy Grace Pelaez sang mainterview sang Bombo Radyo.
Kasunod ini sang ginpatigayon nga sinapol nga ginpangunahan mismo ni Capiz governor Esteban Evan ‘Nonoy’ Contreras kaupod ang Civil Aviation Authority (CAAP) Capiz, Provincial Health Office kag iban pa.
Suno kay Pelaez nga posible sa Hulyo 16, magapanumbalik ang biyahe sang mga eroplano sa probinsiya sa idalom sang duha ka mga airline companies nga ginalakipan sang Philippine Airlines kag Cebu Pacific.
Apang ginklaro ni Pelaez nga ‘special flights’ sa gihapon ang iga-akomodar sa amo nga pahugpaan kun sa diin may tag-duha ka biyahe sa sulod sang isa ka semana ang nasambit nga mga airline companies.
Hugot sa gihapon nga pagasundon ang mga health protocols sa pagpanumbalik sang biyahe sang eroplano.
Mangin prayoridad suno diri nga papulion ang mga una na nga nakabakal kag nakapa-booked sang ila tickets.
Ginpanindugan man sang opisyal nga magapabilin sa gihapon sa rapid test kag 14-day quarantine ang mga magapauli nga pagakabigon nga mga locally-stranded individuals (LSI’s).
Yara naman suno diri sa diskresyon sang isa ka local government units (LGU’s) kun ila nga ipaidalom sa facility quarantine ukon strict home quarantine ang magapauli nila nga mga residente.
Lauman suno kay Pelaez ang pagpaguwa sang gobernador sang isa ka executive order natuhoy sa mga pagsulundan sa pagpanumbalik sang biyahe sang mga eroplano.
