ROXAS CITY – Nagapabilin nga nakaalerto sa karon ang Provincial Disaster Risk Reduction and Management Office sa probinsiya sang Capiz bangud sa bagyo nga Ursula.
Ini ang ginpahayag ni PDRRMO-Capiz Head Judy Grace Pelaez sang mainterview sang Bombo Radyo.
Ini ang kasunod man sa pagbatak sang tropical cyclone signal number 1 sa probinsiya bangud sa nasambit nga bagyo.
Suno kay Pelaez, bisan wala pa makasulod sa Philippine Area of Responsibility ang nasambit nga malain nga lakat sang panahon, nagpatigayon na sila sang emergency response preparedness meeting agud mapreparahan ang nasambit nga bagyo.
Hugot naman ang kooperasyon sang magkatuhay nga ahensiya sang gobyerno kapareho sang Philippine National Police, Bureau of Fire Protection, Department of Social Welfare and Development Office (DSWD), Philippine Red Cross, mga local government units (LGU’s) nga nakahanda nga magresponde sa oras nga kinahanglanon.
Gilayon naman nga ginkanselar ang biyahe sang tanan nga sahi sang sakayan-pandagat kag barko sa mga pantalan sa siyudad sang Roxas base sa abiso sang Philippine Coast Guard (PCG) bangud nagapabilin pa sa tropical cyclone signal number 1 ang probinsiya bangud sa nasambit nga bagyo.
