ROXAS CITY – Kanselado ang biyahe sang tanan nga sahi sang barko ukon sakayan pandagat kasunod sang pagpaidalum sa probinsiya sang Capiz sa Signal No. 1 bangud sa bagyo nga Tisoy nga kahapon nga adlaw nagsulod na sa Philippine Area of Responsibility.
Ginpahayag ni Lt. Commander Edison Diaz, station commander sang Philippine Coastguard (PCG-Roxas) nga gilayon ini nagpapanaug sang direktiba sa mga ticketing office sang mga barko nga kanselado ang biyahe bangud sa malain nga lakat sang panahon.
Wala man ginpahanugutan nga makabiyahe ang duha ka mga motor banca nga buot magpadulong sa Masbate agud malikawan ang trahedya sa kadagatan.
Ginmandu man ni Diaz ang pagpatigayon sang security patrol sa mga coastal areas kag ginapanugyanan ang magagmay nga mga mangingisda nga likawan ang magpa lawud para magpangisda.
Naka-standby man ang mga floating assets sang PCG nga magaresponde pananglitan may magakinahanglan sang ila bulig.
Sa karon yara sa full alert status ang talatapan bilang preparasyon sa epekto nga matuga sang paglaslas sang bagyo Tisoy.
