ROXAS CITY, CAPIZ- Ginasiguro sang Bureau of Jail Management and Penology-Western Visayas ang safety kag security sang mga persons deprived of liberty (PDLs) kag jail officers.
Ini matapos ang hublag-protesta nga ginpatigayon sang mga PDLs sa Negros Occidental District Jail (NODJ) Male Dormitory sa Bago City nga nagpanawagan sang pagkakas kay Jail Warden Chief Inspector Crisyrel Awe bangud sa ginaalegar indi makatawo nga mga polisa.
Sa interview sang Bombo Radyo Roxas kay Atty. Juniven Rey Umadhay, Spokesperson kag Legal Officer sang BJMP Region 6, iya ginpahayag nga handa sila nga hatagan sang igtalupangod ang ano man nga reklamo ukon alegasyon batuk sa ila mga personalidad kaag kun mapamatud-an nga may basehan, gilayon ini nga hatagan sang penalidad.
Suno kay Atty. Umadhay, mandato sang BJMP nga masiguro ang makatawo nga pagtatap a mga PDL kag mapabilin nga malinong kag maprotektahan ang seguridad sang tanan nga yara sa sulod sang presohan.
Pahayag niya, may yara sang dalayon nga pag-tsekyar sa sitwasyon sang mga pasilidad sa rehiyon sa diin adlaw-adlaw may yara sang ginapasa nga status report.
Ginasiguro man ni Umadhay nga safe, malinong kag maayo ang operasyon sang mga jail facilities sa Western Visayas agud ma-promote ang mga programa para sa rehabilitasyon kag pag-umwad sang mga PDL.
Interviewed by Bombo Jessa Mae Siman De Los Santos
