Nagpakigbahin sa World Environment Day subong nga adlaw Hunyo 5, 2025 ang Bureau of Jail Management and Penology (BJMP) Iloilo.
Sa interview sang Bombo Radyo kay Jail Officer 1 Jerous D. Labrador, Unit Community Relations and Services Officer sang Iloilo City District Jail-Male Dormitory, ginapahayag nga may yara sang 20 tanan ka mga personnel nila ang nagpakigbahin sa amo nga aktibidad.
10 ang nagikan sa male dormitory kag 10 man ang nagikan sa female dormitory.
Dugang pa sini, magluwas sa ila nga mga katapo, nagpakigbahin man ang pila ka mga katapo sang government agencies, private establishments, mga eskwelahan kag iban pa.
Nahibaluan nga target nila nga makatanom sang 600 ka mga seedlings sa Sunset Boulevard.
Ang World Environment Day ang may katuyuan nga ganyaton kag hatagan sang ihibalo ang tagsa-tagsa agud sa proteksyon kag pag-amlig sang dunang manggad.
Samtang, gin-athag ni Labrador, nga indi lamang sa World Environment Day sila nagapananom sang kahoy, kundi kada bulan, bangud nga isa ini sa ila nga aktibidad sa BJMP. Mensahe naman sini sa publiko nga kinahanglan may yara sang ihibalo ang tags-tagsa may kaangtan sa pagprotektar kag pag-amlig sang dunang manggad kag indi pagkalipatan ang obligasyon sa pag-ulikid sa dunang manggad.
