ROXAS CITY – Ginpasalig sang hepe sang Bureau of Jail Management and Penology (BJMP) Roxas City Jail nga indi paghatagan sang special treatment ang ginbansagan nga Forex Investment Scam Queen Lourdes Bulaquiña Baarde kag kaupod sini nga si Joel Domayan.
Suno kay Chief Inspector Abner Zamora, Jail warden sang BJMP-Roxas City Jail nga patas ang ginahatag nga treatment sa mga Persons Deprived of Liberty’s (PDL’s) sa sulod sang karsel, mangaranon man ukon pigado.
Samtang, ginpasalig ni Zamora nga pagahatagan sang hugot nga seguridad si Baarde kag Domayan matapos nga may nabaton ini nga pagpamahog sa ila nga kabuhi gikan sa mga investors nga ila natuntuhan.
Sa karon, yara na sa Roxas City Jail sanday Baarde kag Domayan.
Matandaan nga gin-aresto ang duha ka nasambit nga akusado sang mga katapo sang National Bureau of Investigation (NBI-Manila) matapos ginpasakaan sila sang kaso nga syndicated estafa sang mga investors sang FOREX investment scheme sa Capiz.
