Naka-locked down sa karon ang Bureau of Jail Management and Penology (BJMP) Roxas City male dormitory matapos nagpositibo sa COVID-19 ang pito ka mga indibidwal sa nasambit nga facilidad.
Ini ang ginkumpirma sa Bombo Radyo Roxas ni Jail Senior Inspector Dever Fantilaga, jail warden sang BJMP-Roxas Jail.
Kalakip sa mga nagpositibo sa covid19 virus ang apat ka mga BJMP personnel kag tatlo ka mga Persons Deprived of Liberty (PDL).
Ginpasiguro naman sang opisyal nga manageable na sa karon ang sitwasyon sa facilidad, sa diin ginpadala na sa Ligtas Covid Center sa banwa sang Dumalag, Capiz ang tatlo Ka mga PDL’s samtang yara sa quarantine facility sa Hortus Botanicus sa Barangay Milibili, ang apat ka mga BJMP personnel.
Bilang kabahin sang health protocol kag para indi na maglapta ang covid19 temporaryo nga ginsuspende ang mga aktibidad kag gin-untat ang pagbisita sa mga PDL’s sang ila mga pamilya.
Samtang wala nagapati si Fantilaga nga sa mga personnel sang BJMP nagikan ang virus bangud hugot ang ginapatuman nga health protocol sa ila nga hanay humalin nga ginpaidalum sa locked down ang Roxas City.
Antes makaguwa kag makapauli sa ila pamilya ang mga personnel nagapaidalum sila sa 28 days quarantine kag antes makasulod sa facilidad gina-quarantine liwat kag swab test para masiguro nga wala sila sang dala nga virus. Nahibaluan nga may 252 na mga PDLs sa karon ang na-detain sa BJMP-Roxas City jail sa diin 60 na ang ginpaidalum sa swab test kag ginahulat na lamang ang resulta
