ROXAS CITY, CAPIZ- Magapatigayon sang nagkalain-lain nga mga aktibidad ang Bureau of Jail Management and Penology (BJMP) Roxas City para sa mga Persons Deprived of Liberty (PDLs) subong nga Holiday Season.
Sa interview sang Bombo Radyo kay Jail Inspector Rowena V. Magallanes, Acting Warden sang Bureau of Jail Management and Penology (BJMP) Roxas City Female Dormitory, iya ginpahayag nga madamo sang mga gift giving, Christmas party kag recreational activities ang patigayunon sang ila nga talatapan upod ang pila pa ka mga organisasyon para sa mga PDLs.
Suno kay Magallanes, ang tema para sang mga aktibidad nakasentro gid para sa mga PDLs sa diin amo ang ‘Gugma para sa Paskwa, Paglaum para sa ila.’
Pahayag niya, nag-umpisa naman ang Simbang Gabi sa ila nga pasilidad sa diin nga ang tanan nga mga PDLs nagatambong sa misa.
Nagapanawagan naman ang natungdan sa tagsa ka mga pamilya sang PDLs nga kun mahimo bisitahon nila permi ang ila nga mga himata agud nga indi man ma-stress kag kaangay madulaan sang paglaum.
Interviewed by Bombo Francis Biñas
