ROXAS CITY, CAPIZ – Nagpatigayon ang Bureau of Jail Management and Penology (BJMP)- Roxas City sang Valentines Day program para sa mga Persons Deprived of Liberty (PDL).
Sa interview sang Bombo Radyo kay Jail Inspector Hazel Miralles, Assistant Warden sang Bureau of Jail Management and Penology-Roxas City, iya ginpahayag nga tinutuyo sang amo nga aktibidad amo ang ipabatyag sa mga PDL ang adlaw sang tagipusuon kag agud ma-express man ang ila romantic side.
Suno kay Miralles, may ginpatigayon nga Valentine special kun sa diin may ginhatag nga bouquet kag couple shirts sa mga mag-asawa nga PDL kaupod ang ila sini mga kabataan.
Samtang, may ginpatuman man nga checking and searching sa tanan nga nagasulod agud masiguro ang seguridad sang pasilidad.
Pahayag pa niya, ini ang tuigan na nga ginahiwat kaupod sang pila ka mga partner agencies sang ila talatapan.
Dugang pa sang natungdan, magapadayon ang mga programa nga makabulig sa tanan nga PDL sa pagpasanyog sang ila mga buot sa padayon nga pagbag-o.
INTERVIEWED BY: BOMBO ROADNIE DABAN DALANON
