ROXAS CITY – Malipayon nga ginpakigbahin sang isa ka manunudlo kag blood donor ang iya nabatyagan sa tagsa ka pagdonar sang dugo sa mga ginapatigayon nga bloodletting activity sa probinsya partikular na sa Dugong Bombo sang Bombo Radyo Philippines.
Sa programa nga Good Morning Philippines, ginpahayag ni Mr. Alexandro Alba nga nag-umpisa ini bilang blood donor matapos nga nagkinahanglan man sang dugo ang iya nga tiayon para sa isa ka operasyon.
Suno kay Alba nga daku ang nabulig sang dugo nga ila nakuha sa Philippine Red Cross-Capiz chapter, bangud nangin alagyan ini agud mabuligan ang iya nga asawa.
Para man mapakita ang iya nga pagpasalamat, nagdesisyon ini nga magdonar sang dugo sa tagsa ka mga bloodletting activity, agud bisan paano makabulig man sa iban nga tawo nga nagakinahanglan.
Ginpakigbahin man sini ang manami nga pamatyag matapos nga makuhaan sang dugo kag mangin isa sa mga successful blood donors.
Magluwas diri, ginpahayag man ni Alba nga madamo man sang mga health benefits nga makuha kun naga-donar sang dugo ang tawo.
Mahibaluan nga isa si Alba sa mga successful blood donors nga masami nagadonar sang dugo sa Dugong Bombo.
