ROXAS CITY – Ginkumpirma sang donor recruitment officer sang Philippine Red Cross-Capiz chapter nga ginakulang na ang platelet consentrate blood sa ila nga talatapan nga amo ang ginagamit sa dengue patients.
Sa interview sang Bombo Radyo Roxas kay Mr. Ketch Armiza, ginpahayag sini nga samtang padayon ang pagtaas sang numero sang mga nagamasakit sang dengue, amat amat na nga nagakaubos ang suplay sang dugo sa Red Cross, butang nga nagahatag pagkabalaka sa mga opisyal sang ahensiya.
Ang kakulang sa suplay sang dugo ang ginakabig nga daku nga problema sang Red Cross, bangud nakasalalay diri ang kabuhi sang mga pasyente nga nagakinahanglan sang dugo, labi na ang nagasuprer sang dengue nga kinahanglan magpaidalum sa blood transfusion.
Isa ka option nga nakita ni Armiza kun indi available ukon naubos na ang platelet consentrate blood nga ginatransfuse sa dengue patient mahimo man gamiton ang fresh frozen plasma, apang depende sa gihapon sa desisyon sang doktor.
Nahibaluan nga sumugod nagtaas ang numero sang dengue cases sa probinsiya adlaw adlaw may nagapadulong na sa talatapan sang Red Cross para magkuha sang dugo nga gamiton sa ila nga pasyente nga may sakit nga dengue.
