ROXAS CITY – Ginpadal-an sang sulat ni board member Eleuper ‘Bulilit’ Martinez ang apat ka mga kaupdanan sini nga board members, nga sanday board members Weldie Apolinario, Elmer Arevalo, Jonathan Besa kag Thea Faith Reyes, may kaangtanan sa ginpahayag ginpangbuy-an sang mga ini nga akusasyon sa radyo kag sa social media batuk sa nasambit nga board member.
Sa interview sang Bombo Radyo kay Martinez kag sandig sa kaungdan sang iya sulat, gin-akusahan ini sang apat ka mga board members nga nagapangsuhol ini sa iban nila nga kaupdanan agud aprubahan ang Annual Investment Plan kag Executive Budget.
Ginpahayag sini nga wala sang legal nga basehan ang amu nga akusasyon.
Bangud diri, ginsiling ni Martinez nga nagtuga ini sang kahuy-anan sa iya reputasyon kag nagresulta sang indi maayo nga katulogon kag nagtaas ang iya blood pressure.
Napetsahan ang amu nga sulat sang Enero 11, kag nabaton sang mga natungdan pagka-aga sang Enero 12, 2022
Ginhatagan ni Martinez sanday Apolinario, Arevalo, Besa kag Reyes sang lima (5) ka adlaw nga plaso matapos mabaton ang amu nga sulat nga mag-public apology kag bawion sa ila regular session ang mga akusasyon sa iya, sa labing madali nga panahon.
Sa tion nga mapaslawan ang mga ini, mapilitan si Martinez nga magpasaka sang libel batuk sa nasambit nga mga provincial boards.
