BM Besa ginkumpirma nga wala pa maaprubahan ang gina-request nga supplemental budget sa kinahanglanon sang mga ospital sa COVID-19 crisis

ROXAS CITY – Wala pa maaprubahan sang Sangguniang Panlalawigan ang gina-request nga supplemental budget para sa mga kinahanglanon sang mga ospital para sa COVID19 crisis sa probinsya sang Capiz.

Ini ang ginkumpirmar ni Board Member Jonathan Sonny Besa, Chairman sang Committee on Finance and Appropriation sang mainterview sang Bombo Radyo.

Ginpabutyag ni Besa nga 87.8 milyon ka pesos ang kabug-osan nga gina-request nga supplemental budget sang Roxas Memorial Provincial Hospital (RMPH) kag iban pa nga mga district hospitals para ipambakal sang mga bulong,mga Personal Protective Equipment’s (PPE’s) kag iban pa nga mga kinahanglanon sang mga ospital.

Apang, ginbuhinan ni Capiz Governor Esteban Evan Contreras ang gina-request nga supplemental budget sang apat ka mga district hospitals magluwas sa RMPH.

Kalakip sa mga gin-aprubahan sa special session sang sangguniang panlalawigan amo ang 22 milyones ka pesos nga pondo para sa 5^th tranche sang Salary Standardization Law, 3.6 milyones ka pesos nga pondo para sa pagpakay-o sang opisina sang Sangguniang Panlalawigan kag 7 milyones ka pesos nga pondo para sa sweldo sang mga job order employees sang Bureau of Information, talapan sang hospital management service kag special concerns office sang provincial capitol.