ROXAS CITY – Gintul-id sang chairman sang committee on appropriations ang kabug-usan pa lamang nga gin-aprubahan nga budget sang Sangguniang Panlalawigan para sa Capiztahan 2024.
Sa interview sang Bombo Radyo kay Board Member Jonathan “Sonny” Besa, ginpahayag sini nga yara pa lamang sa P62,979,164.73 ang kabug-usan nga nagastos sa selebrasyon sang Capiztahan 2024 nga amo man ang ila naaprabuhan.
Ginhimo sini ang pagtul-id agud bawion ang nauna sini nga pahayag nga naglab-ot na sa kapin P80M ang naaprabuhan nga pondo.
Pagklaro ni Besa, wala sini matalupangdan nga may yara sang nalakip nga budget para sa proyekto sang Provincial Engineering Office kag pagbakal sang dugang nga equipment para sa Provincial Radio station sa ila anay gin-aprubahan nga mga request para sa Capiztahan nga naglab-ot sa masobra P16M rason nga nahambal sini nga nagdangat sa P80M ang naaprabuhan nga pondo para sa Capiztahan 2024.
Samtang, pagahinalaan pa sa Miyerkules nga adlaw pinaagi sa committee hearing ang supplemental request nagikan sa Human Resource and Management Office kun sa diin nagahinyo ini sang dugang nga P864,000.00 nga supplemental budget kag subong man P1,597,365.00 nga hinyo naman sang Provincial Information Office.
Sa tion nga maaprubahan ang dugang nga request, magalab-ot sa P65,440,529.00 ang kabug-usan nga magastos para sa Capiztahan.
Nahibaluan nga P130 Million ang gintalana nga budget para sa Capiztahan 2024 kun sa diin mas ukon menos katunga palang sang pondo ang nagastos sa nasambit nga selebrasyon sang probinsya.
