ROXAS CITY — Nakulangan si Board Member Jonathan Besa sa mga inisyatibo nga ginahimo ni Governor Esteban Evan Contreras II agud mapakigbatuan ang pamahog sang coronavirus disease 2019 (COVID-19) sa probinsiya.
Sa interview sang Bombo Radyo, ginpahayag ni Besa nga wala pa siya sang may nakita nga maathag nga mga plano ukon tikang sang executive department nga ipatuman agud masabat ang problema sa COVID-19.
Suno sa opisyal, mangin ang pila ka mga doktor sa probinsiya ang nagpangabay sa ila sa Sangguniang Panlalawigan nga maghimo sang tikang agud makadihon sang klaro nga programa ang gobyerno probinsiyal sa pagbato sa nasambitan nga balatian.
Dismayado man si Besa nga sa pihak nga sila na mismo sa sanggunian ang nagpalapit sa gobernador kasunod sang pagdeklarar ni Presidente Rodrigo Duterte sang state of public health emergency sa pungsod bangud sa COVID-19, wala man ginpresentar sa ila sang gobernador ang mga plano sini.
Wala man sang may ginbunga ang ila imbitasyon sa mga katapo sang Provincial Health Office nga magtambong sa ila emergency meeting agud mahinalaan ang ila preparasyon batuk sa COVID-19 bangud wala man nagtambong ang mga ini.
Luyag kuntani nila sa sanggunian nga sang wala pa nagsulod ang COVID-19 sa probinsiya, maka-hire sang dugang nga health workers ang gobyerno probinsiyal kag hatagan sila sang dugang nga mga insentibo kaangay sang hazard pay, insurance, kag pasakaan ang ila sweldo agud mangin preparado sila sa pag-atubang sang emerhensiya.
Gintuad pa sini nga nakabaton siya sang impormasyon nga may mga nurses na sa Roxas Memorial Provincial Hospital nga nagaplano nga mag-resign bangud sa kabudlay sang ila kahimtangan.
Ini nga mga nurses suno sa iya ang naka-assign mismo sa ward kun sa diin ginatatap ang mga persons under investigation (PUI) bangud sa COVID-19.#
