Personal nga magapadulong sa Camp Crame ang isa ka board member agud hibaluon ang update sa imbestigasyon sang Criminal Investigation and Detection Group (CIDG) sa ginaalegar pagkidnap sa CEO sang Double your Money Investment Scheme.
Ginpahayag ni Board Member Eleuper ‘’Bulilit’’Martinez nga karon yara sa Metro Manila, nga bangud wala sang response ang CIDG sa ginahinyo nga incident report sang Sangguniang Panlalawigan sang Capiz, personal ini nga magapakig-angut sa nasambit nga ahensiya agud matul-id kun diin na kutob ang imbestigasyon sa nasambit nga kaso.
Ginkumpirma pa ni Martinez nga gintanyag man sini ang serbisyo kag facilidad sang Sangguniang Panlalawigan kay Atty. Jeremiah Sargado, asst. regional director sang NBI-Region 6 bangud luyag man nila nga mahatagan sang hustisya ang nadangatan sang mga investors nga nagsalig sang ila hard earned money sa investment scheme ni Chiyuto.
Nakalab-ot man sa iya ang impormasyon angut sa kapaslawan nga ma-file ang kaso nga large scale estafa kag syndicated estafa sa duha ka mga CEO sang Double your Money Investment Scheme sa diin bisan paano nanugon ini sa effort sang NBI nga nagpadulong sa Roxas City.
Ginsuhestyon man sini sa NBI nga magjoint effort sila kaupod ang IBP Capiz chapter agud matun-an ang tikang sa pagfile sang panumbungon nga indi ini ma-dismiss ukon mabasura.
Samtang wala malikawan nga magpautwas sang sentmyento si Martinez may kaangtanan sa complaint affidavit sang mga complainant nga nagdangup sa iya talatapan nga nagdangup pa gid sa IBP Capiz chapter.
Indi mahangpan sang opisyal nga ginapangayuan pa sang IBP-Capiz ang mga complainant sang affidavit of indigency kag social case study gikan sa DSWD ukon MSWD.
Para kay Martinez nga indi na kinahanglan obligahon ang mga complainants sang dugang nga rekisitos bangud mahimo nga maka-file sang complaint bisan wala na ang duha ka requirements.
