ROXAS CITY-Mabaskog ang pagpati ni Board member Eleuper ‘’Bulilit’’ Martinez nga may malain nga motibo si Provincial administrator Dr. Edwin Monares sang nagpost ini sa iya facebook account nga gina-atake sini ang mga katapu sang Sangguniang Panlalawigan.
Ginpahayag ni Martinez nga ginsabat lamang sini ang kaundan sang post ni MOnares nga nagapakalain sa SP, bangud siya bilang miyembro sang sanggunian ang luyag tadlungon ang sala nga mga impormasyon nga ginapaguwa sang provincial administrator.
Ginapanindugan sang opisyal nga half truth kag kabutigan ang ginapaguwa nga mensahe ni Monares kag tuyo nga higkuan ang imahen sang provincial board.
Nagapati si Martinez nga nag-ugat ang post ni MOnares batuk sa provincial board posible bangud luyag sini nga buhion ang nangin desisyon sadto sang mga board members sang wala nila ginhatagan sang pondo ang Hospital Management Section kag Special Concern Office nga ginapakigbato sang Provincial administrator.
Suno sa board member nga sa idalum sang local government code, wala sang poder ang office of the governor nga magtukod sang isa ka office nga wala nagaagi sa provincial board.
