ROXAS CITY – Ginklaro ni Board Member Mateo Hachuela nga indi kinahanglan ni Capiz Governor Esteban Evan Contreras nga tudluan ang provincial board sa ila patigayunon nga budget may kahilabtanan sa pagdihon sang pondo para sa mga public hospitals sa probinsiya.
Suno kay Hachuela nga indi dapat pagpa-intrahon ni Contreras ang mga hospital officials nga magaserbe nga resource persons sang provincial board sa ila nagapadayon nga budget hearing bangud ang mga ospital ang nagakinahangalan sang dugang nga pondo agud mas mapasanyog ang serbisyo nga ila mahatag sa mga Capizeño.
Gindugang ni Hachuela nga nagaka-angay lamang nga kinahangalan nga may yara sang maayo nga relasyon ang mga hospital officials kag ang provincial board bangud sa ila naga-agi ang pondo kag matalakay man ang mga kakulangan sa mga ospital.
Sa karon naga-apelar si Hachuela sa ila gin-imbitar nga mga resource persons nga kun mahimu magtambong sa ila patigayunon nga budget hearing agud makadihon sang nagakaigo nga pondo para sa mga ospital.
Ginalauman ni Hachuela kag sang iya mga kaupdanan sa provincial board ang pagtambong sang mga hospital officials sa masunod nga Martes nga adlaw, Pebrero 4, sini nga tuig 2020.
