ROXAS CITY – Ginbasa ni Board Member Eleuper Bulilit Martinez sa iya nga privilege-speech sa ginpatigayon nga sesyon sang Sangguniang Panlalawigan sang probinsiya ang iya nabaton nga mensahe gikan kay Provincial Administrator Edwin Monares.
Ang amo nga mensahe ang ginpahayag sini sabat sang administrador sa open letter ni Board Member Weldie Apolinario nga naka-address kay Governor Esteban Contreras nga nagapa-revoke sang appointment ni Monares.
Suno kay Martinez nga kaundan sang ginpadala sa iya nga mensahe ni Monares nga normal lamang nga magpabutyag sang sentimyento, pagpati kag ideya ang tawo, apang siguraduhon lamang nga wala ini nagalapas sa public morals.
Ginpanindugan man suno diri ni Monares nga wala sa hurisdiksyon sang Sangguniang Panlalawigan nga maghusgar kun administrative performance sang isa ka administrador ang estoryahan bangud separado nga sangay sang gobyerno ang executive kag legislative branch.
Sa isyu nga nagasiling ‘unfit’ si Monares nga mangin provincial administrator bangud indi siya isa ka Capizeño, ginpahayag man sang administrador nga wala ini sang balasehan.
Ini bangud bisan alkalde, gobernador kalakip ang mga kongresista ang sarang makapadalagan kag makaserbi bisan pa nga indi sila tumandok sa lugar.
Ang importante lamang nga naka-establisar sila sang nagakaigo nga tuig sa ila nga pag-estar sa amo nga lugar.
Ginsabat man sini ang akusasyon nga arogante ini kag indi makabaton sa iya nga kasal-anan bangud suno diri nga tuman ka judgemental ang nasambit nga mga tinaga.
Sa ulihi, ginpanindugan naman ni Martinez nga wala siya sang kahilabtanan sa open letter ni Apolinario kag iya gid lamang ini nga gin-edit.
