ROXAS CITY – Naghatag sang reaksyon si Board Member Eleuper “Bulilit” Martinez sa kontrobersiyal nga laragway sini sa facebook nga ginpost sang isa ka netizen nga nagpakilala kay Casper Salvador nga ginapyestahan karon sa social media.
Sa exclusive interview sang Bombo Radyo kay Board Member Martinez, ginpahayag sini nga indi siya apektado sa ginhimo sang isa ka netizen nga pagbutang sa iya ulo sa crater sang Bulkan Taal nga may caption nga “Diri ini nagakadapat bangud sa iya pagkabastos’’.
Makita man ang gin-screenshot nga messages ni Martinez nga napagkit ang tuman ka vulgar nga tinaga nga ginapatuhoy sa netizen nga ginapatihan rason sa pagpost sang nasambit nga laragway sang opisyal sa baba sang Taal volcano.
Aminado si Martinez nga nahimo gid man sini ang pagpost sang vuilgar words nga ginapatuhoy man sini sa isa ka netizen nga ginapatihan troll bangud personal attack na ang ginahimo sa iya kag ginlaragway ini sa indi maayo nga mga tinaga nga nagabastos sa iya nga pagkatawo.
Suno sa opisyal nga tawo lamang ini nga may balatyagon kag may pamilya man nga nasakitan.
Ginpahayag pa sang board member nga maayo ini sa mga tawo nga maayo man sa iya, apang kun sagaron ang iya pasensiya, wala ini sang mahimo kundi depensahan man ang iya pagkatawo kag magbato.
Suno pa gani sa iya, “all is fair in love and war.”
Apang nagapangayo ini sang pasaylo sa pamilya sang netizen kun may yara gid man ini sang pamilya, bangud sa iya pagpost sang indi maayo nga tinaga.
Liwat gin-athag ni Martinez nga wala kuntani naglala ang isyu, kun wala siya ginpersonal , ginmulay kag naggamit sang “below the belt” nga mga tinaga nga kasubong wala siya ginarespeto bisan sa iya na gid lamang pagka board member.
